Закрыть
Логин:
Пароль:
Забыли свой пароль?

Войти    

Өг-бүле хүнүнге уткуштур уругларга ачы-дуза

Өг-бүле хүнүнге уткуштур уругларга ачы-дуза 07.05.2013
Май 15-те Өг-бүле хүнүнге уткуштур Кызылда «Енисей» Культура бажыңының коллективи «Бичии кижиниң карактарынче көр» деп ачы-дуза акциязын эрткен чылын бир дугаар эрттирген. Ооң кол сорулгазы – Улуг-Хемниң оң талазында микрорайонда чединмес чуртталгалыг өг-бүлелерниң уруг-дарыынга идик-хеп-биле дузалажыры. Бо чылын ол акцияга апрель айның эгезинден белеткенгеш, 27-ниң хүнүнде эрттирген. Ниитизи-биле 100 ажыг өг-бүлелерниң уруг-дарыы боттарынга эки шынарлыг идик-хепти шилип алганнар. Идик-хептиң аразында чаа идик-хеп база хөй болган. Ол дээрге бистиң эгелээшкинивисти эгезинден деткээн, бо чылын аңаа каттышкан шыдалдыг өг-бүлелер болгаш сайгарлыкчыларның дузазы-дыр деп, Культура бажыңының уран чүүл удуртукчузу Галина Марченко дыңнаткан.

«Бичии кижиниң карактарынче көр» деп акцияга «Енисей» Культура бажыңының ажылдакчылары № 8, 3, 5 школаларны, «Кызыгааржы» уруглар клувун, «Сайзырал» төптү хаара туткан. Ынчангаш акция чүг-ле бо Культура бажыңының эвес, а бүгү хоорайның эрттирген акциязы апарган. Акция ооң киржикчилеринге бараалгаткан концерт-биле доозулган.

«Шынның» медээзи.

Возврат к списку