Закрыть
Логин:
Пароль:
Забыли свой пароль?

Войти    

Тыва бижикке мөңгүн тураскаалды ажыткан

Тыва бижикке мөңгүн тураскаалды ажыткан 25.07.2013
"Түрк руника: дыл, төөгү, культура" деп делегей чергелиг эртем конференциязынга тыва бижикке чаа тураскаалдың – тайбыңның болгаш эртем-билигниң чырыын тудуп турар мөңгүн субурганның ажыдыышкыны болган.

Тураскаалдың дугайында конференцияның аалчыларынга ону тургузарының эгелекчизи Бичелдей Каадыр-оол тодаргай чугаалап берген. Ол боду субурганны езу-чурумга дүүштүр дерип, ооң дөрт талазынга хуу коллекциязындан буддист статуэткаларны тургускан.

Тураскаалга мөңгүннү бүгү хөй-ниити демнежип тургаш чыгган. Тываның гуманитарлыг шинчилелдер институдунуң ажылдакчылары хөйнү чыгган, бир килограмм мөңгүннү Тываның Баштыңы Шолбан Кара-оол чаагай күзелдер-биле сеткилинден берген. Тураскаалга ниитизи-биле 24 килограмм мөңгүннү ажыглаан. Ынчалза-даа тураскаал улуг, деңзизи оон аар. Чүл дээрге, субурганның таваан чуга демирден кылган бооп турар. Чаартыкчы Будданың база Сакьяпа башкының овур-хевирин болгаш өске бүгү каасталгаларны ылап-ла арыг мөңгүнден кылган.

Сакья – тибет буддизмниң школазы, ооң төлээлери эртем-билиглии-биле ылгалып, хөй санныг чогаадыгларның авторлары болуп турган. Бо школа политиктиг идепкейжизи, каттыштырыкчы чоруу-биле база алдаржаан турган. Ынчангаш чаа тураскаал чүгле эртем-билигни камгалап, кадагалап турар эвес, каттыжарынга база дузалап турар.

Тураскаалды Бай-Тайгадан билдингир скульптор, ювелир Сергей Кочаа кылган болгаш Тываның Национал музейинге турар.


Возврат к списку