Закрыть
Логин:
Пароль:
Забыли свой пароль?

Войти    

Дүргенде «Дүрген» шуулганы

Дүргенде «Дүрген» шуулганы 19.07.2014

Тываның аныяк сайгарлыкчыларының шуулганынга Москваның, Новосибирскиниң болгаш Томскиниң бизнес-школаларының консультантылары киржир.

ТР-ниң Аныяктар болгаш спорт херектериниң талазы-биле яамызының «Тыва — сайзыралдың девискээри» деп төлевилелге дүүштүр организастааны аныяктарның «Дүрген-2014» шуулганы Тывага июль 14-тен ажылын эгелээн. Тургустунган чаңчыл езугаар шуулган Таңды кожуунда чараш бойдус чурумулдыг Дүрген-оруу деп черге турисчи слет хевирлиг болуп эртер. Шуулганның организакчыларының дыңнадып турарын езугаар алырга, аңаа киржириниң чагыын республиканың 17 кожуунундан, а ол ышкаш тыва студентилерниң чаңгыс чер-чурттуглар бөлүктеринден база Россияның 15 регионундан киирген. Оон аңгыда Москваның, Новосибирскиниң болгаш Томскиниң бизнес-школаларының башкылары Тывага келирин дыңнатканнар, олар шуулганга лекциялар номчуур болгаш өөредилгелерни эрттирер.

Ол хемчегге 2 шөлчүгеш ажылдаар: бирээзи сайгарлыкчыларның, өскези — социал. Оларга аныяк болгаш эгелеп чоруур сайгарлыкчыларның 50 ажыг төлевилелдерин камгалаар. Камгалалдың түңнели-биле төлевилелдерни республика бюджединден деткимче көргүзер регион программаларынга киирер. Эрткен чылдарда аныяктарның бизнес-төлевилелдерин тургускаш, мөөрей тиилекчилери болганнар боттарының дуржулгазын дамчыдар.

Шуулган Тывада кол байырлал — Тываның болгаш Россияның демнежилгезиниң 100 чылының демдээ-биле эртер. «Дүрген-2014»-түң тургускан лагеринге республиканың Национал музейи «Тыва: дүүн, бөгүн, даарта» деп чурт-шинчилел делгелгезин көргүзер. Тыва черниң төөгүзү-биле холбашкан лекциялар база болур, ооң соонда аныяктар тус-тус мөөрейлерге киржирлер.

«Шуулганның ажылын 2 ээлчегге организастаан: июль 14-тен 18-ке чедир өөредилге угланыышкынныг, 20-ден 27-ге чедир — спортчу. Ниитизи-биле ооң программазында чугула өөредиглиг, билиг чедип алыр, ойнап-хөглээр болгаш өске-даа 10 хире хемчеглер кирген» — деп, аныяктар болгаш спорт херектериниң сайыдының оралакчызы Ольга Грачева чугаалап турар.


Возврат к списку